Hæ.

Ég er búinn að vera svo lengi frá að ég varð að koma með eitthvað fyndið.

Æjæjæj

Er bloggið dautt? Nei, svo aldeilis ekki. Ég var bara veikur. Já, og er eiginlega ennþá veikur. Fékk svona líka slæma hálsbólgu í vikunni og bryð núna pensillín eins og mér sé borgað fyrir það. Það er ekki svo bragðgott.

Hvað er nýtt af málefnum? Sá ensku útgáfuna af Hrigittu Baukdal hjá Gísla Marteini í gær. Oh, Gísli er alveg frábær. Það var búið að breyta stolna hlutanum af laginu, en það breytti því ekki að lagið er viðbjóður, auk þess sem þetta tiltekna lag var ekki kosið í símakosningu hér á landi... Leðjan til Lettlands!!! Æ, ég held að það sé vonlaus barátta.

Liverpool duttu út úr Evrópukeppninni. Lítið annað um það að segja. Sá ekki leikinn vegna veikinda, en mér skilst að við gátum ekki neitt.... frekar en fyrri daginn. Þetta er ekki alveg búið að vera nógu góður íþróttavetur hjá mínum liðum: Barcelona (gott og slæmt), Napolí (barátta í seríu B), Liverpool (ekki nógu gott, en vill þó benda á að þeir hafa fleiri titla en öll önnur lið á Englandi samanlagt). Lakers eru tæknilega búnir að skíta á sig en mér sýnist að þeir séu að verða búnir að skeina sér og fari jafnvel að hætta að nota bleiju. Þeir kúka bara í hádeginu hér eftir og spila svo á kvöldin.

Er enn að skoða ferðamöguleika fyrir sumarið. Er búinn að skipuleggja ferðir allt frá USA til Frakklands til Ítalíu til Spánar til Þýskalands til Austurríkis til Ungverjalands til Póllands. Margt í stöðunni. Kemur vonandi í fjós fljótlega.

Mig langar að bjóða Steinar Arason velkominn aftur í bloggið. Hans var sárt saknað.

Hagnaðurinn

Skrapp í bíó í gær.

Það er stundum gaman, stundum leiðinlegt. Samt hefur leiðinlegum bíóferðum fækkað nú á seinni árum. Ég bara man ekki hvenær ég sá síðast lélega mynd í bíó. Hins vegar sé ég oft slæmar myndir á myndbandsspólum. Það er önnur saga.

Allavega, þá sá ég 25th Hour í gær. Spike Lee jóna með Edward Norton í aðalhlutverki. Þetta var mynd um eiginlega ekkert þannig séð; það var ekkert eiginlegt plott í myndinni. Engin flækja, ekkert rugl. Bara svona character mynd og var góð sem slík. Leikararnir héldu henni uppi. Eitt atriði var sérstaklega frábært. Það var þegar Norton karakterinn stóð fyrir framan spegil og notaði F-orðið óspart gegn öllum menningarhópum New York borgar, og auðvitað sjálfum sér ... hann var jú á leiðinni í fangelsi eftir 24 tíma; hence, 25th Hour. Ég mæli með því að þið sjáið þessa mynd. Stj*rnugj*f: 82/100

Hagnaðurinn

Mikið er gott að það sé kominn föstudagur...

Já, hvað er meira hressandi en þegar vinnudegi lýkur á föstudegi... namminamm. Eins og fram hefur komið þá hata ég vinnuna mína. En það er erfitt að fá eitthvað annað. Ég tek samt köst annað slagið og sæki um útum allt. Eitt slíkt kast var einmitt í gær. Fór ég þá í herferðina “Sumarstarf 2003”. So far so bad. Ekkert hefur gerst enn, enda stutt síðan herferðin hófst. Vonandi gerist eitthvað því annars verð ég geðveikari en ég þegar er orðinn. Það gæti samt orðið hressandi.

Helvítis Rás 2 í dag. Það var verið að fara yfir listann “NME bestu plötur allra tíma” og það var getraun hver var númer 1. Ég vissi svarið, enda hef ég séð þennan lista einhvers staðar. En ég náði ekki inn. Helvítis. En diskurinn er engu að síður góður: Stone Roses-Stone Roses. Tilvalinn í spilarann þegar verið er að grilla. Prófið bara, það er alger snilld.

Hélt smá Karlakvöld síðasta laugardag. Það var vel heppnað eins og áður. Mættir voru Krissi, Atli og Danni. Raggi og Steini komust ekki. Svei Svei. Á matseðlinum voru grilluð svínarif. Þetta var í fyrsta skipti sem ég elda svona... hef bara borðað þetta áður. Þetta tókst ágætalega. Menn voru saddir og nöguðu beinin karlmannlega. Þetta er eiginlega the ultimate karlamannsmatur. Já, það er gott. Einnig héldum við hina fyrstu vondulagakeppni ‘ónefnds karlaklúbbs’. Það er skemmst frá því að segja að ég og Daníel vorum efstir og jafnir með 2 atkvæði hvor. Ég var með eitthvað lag með Glamma Kid en Danni mætti með Leoncie. Slæm lög bæði tvö en þau komast bæði í lokakeppnina, Vondóvision, sem fram fer síðar á þessu ári, og boðsgestir munu þá kjósa hvert var versta lag ársins. Allt voða skemmtilegt. Hringdum líka í Sigurð Óla og B-Knuts. Hressir strákar í Pitt fílíng. Óli átti afmæli og við sungum honum til heiðurs.

Jæja, nýja Beastie Boys lagið er að verða komið. Ætla að fara að hlusta á það.

Heyrumst,
Hagnaðurinn

Kaupmannahöfn

Hagnaðurinn og frú skruppu til Kaupmannahafnar síðastliðna helgi. Var margt gert sér til dundurs og gaman gaman. Hér er ferðasagan.

Laugardagur 1. mars.
Það var vaknað ansi snemma þennan morguninn, eða um sexleytið. Við áttum flug klukkan 8:30 með Iceland Express. Höfðum gert svaka díl á netinu. Flugið var ágætt fram að lendingu. Lágmarksþjónusta um borð, en þó boðið uppá drykki og mat gegn vægu gjaldi. Maður byrjaði daginn að fá sér einn kaldan, eða tvo. Alltaf gaman að fara til útlanda. Svo kom lendingin, og ég verð að segja að þetta var sú versta lending sem ég hef lent í, og farþegar bókstaflega öskruðu þegar við lentum; eða réttara sagt skullum niður. Þetta var högg og maður skoppaði í sætinu. Á flugvellinum hittum við Íslendinga sem voru svipað ‘lost’ og við hvernig best væri að koma sér í bæinn, svo við deildum leigubíl... þetta var enginn annars en Hemmi ‘Feiti’ og frú. Hemmi er ekkert feitur. Bara svona venjulegur.

Við höfðum pantað hótel á netinu, og reyndist það vera á Helgolandsgade, rétt við Istegade. Þetta var víst vafasamt hverfi, en samt nálægt miðbænum. Það var ágætt. ‘Double room’ reyndist vera tvö lítil rúm. Skrítið. Annars alltílæ herbergi. Betra en New Orleans forðum daga.

Þá var tími til kominn að tjekka á borginni. Klukkan var þegar orðin 14:30 svo það var um að gera að drífa sig á strikið. Stefnan var tekin beint á H&M... svo aðra H&M... svo þá þriðju, og sú var alveg viðbjóðslega stór. Það var töluvert verslað í þessum búðum, m.a. náði ég að versla mér jakkaföt og er ég ákaflega ánægður með þau. Harpa keyti ýmislegt að hætti hússins.

Eftir lokun búða kl. 17:00 var rölt niðrí Nyhavn (is. Nýhöfn). Það átti að vera frábær staður. Ekki var hann fallegur þetta laugardagssíðdegi. Höfnin var frosin og enginn á ferli. Kannski ekki furðu því það var alveg skuggalega kalt í Köben þennan dag. Úff, ég fæ hroll við tilhugsunina. Því var brunað á Kaffi Norden til að hita sig. Hvað er þá betra en kaldur Carlsberg?

Um kvöldið fórum við út að borða með Hildi, vinkonu Hörpu, sem stundar nám þarna og Troels, kærasta hennar, en hann er Dani og hjólabrettahetja. Var ákveðið að fara á ástralskan stað sem heitir svo mikið sem ‘Reef N´Beef’. Lítill og notalegur staður skammt frá ráðhústorginu. Skemmdi helst fyrir að helmingur gesta þetta kvöldið voru Íslendingar og létu þeir flestir dólgslega. Hefðu þeir fremur átt að hegða sér eins og heimsborgarar eins og við hin. Allavega, þá ákvað ég að fara á framandi brautir þetta kvöldið eins og sönnum heimsborgara sæmir. Því fékk ég mér krókódíl í matinn. Afar ljúffengur verð ég að segja. Og ekki skemmdi fyrir að skola honum niður með ísköldum Fosters. Harpa var ekki síðri og snæddi kengúru og drakk rauðvín með. Nammi namm.

Kvöldið var enn ungt. Við tók ganga þvert og endilangt yfir miðbæinn að einhverjum stað sem átti að vera frábær. Hann reyndist vera troðfullur og ógeðslegur. Sannkallað skítabæli eiginlega, en viti menn... fullur af fullum Íslendingum. Ég þekkti engan þeirra. Næsta stopp var einhver smá búlla. Við stoppuðum þar því við fengum sæti. Fyrir fróðleiksþyrsta þá man ég ekki nöfnin á þessum stöðum. Leiðinlegt. Að lokum fórum við á dansklúbb sem var einhvers staðar. Ég var orðinn töluvert ölvaður eins og við var að búast og veit hreinlega ekkert hvert við fórum. En staðurinn reyndist vera ágætur. Heim í háttinn um 04:00. Ekki seinna vænna, enda planað að vakna snemma daginn eftir og gera eitthvað svakalegt.

Sunnudagur 2. mars
Það er ekki hressandi að vakna fyrir klukkan 10 eftir fyllerí. Ég gerði það nú samt. Skóflaði í mig einhverjum morgunmat á Hótel Selandia. Sérstaka athygli mína vakti nýstárlegur ostaskeri. Gaman.

Tempó tempó. Grrrrr, það var enn kalt. Ég er ekki að tala um venjulegan kulda, heldur eitthvað miklu meira. Aldrei hefur Hagnaðurinn upplifað annan eins kulda. Því var tilvalið að fyrsti viðkomustaður yrði innandyra. Fórum við á vaxmyndasafn bæjarins. Ég hafði komið þangað áður og var fátt nýtt. Samt ágætis labb.

Við skoðuðum konungshöllina... að utan og var það tóm steypa. Svo var bara labbað víða og farið inní allar opnar búðir til að hlýja sér. Voru það aðallega minjagripaverslanir. Afar skemmtilegt. Fórum einnig upp turn sem heitir ‘Round Tower’. Þaðan var útsýni ágætt og kuldi mikill.

Eftir einn Tuborg var farið í Kristjaníu. Harpa hélt við myndum verða drepin.... áður en við fórum. Reyndist svo ekki vera. Þetta er heillandi svæði. Kannabisefni flæðandi útum allt og fólk að fá sé. Hápunktur ferðarinnar var þó þegar við fórum inná bar þarna og ég sá Steven Gerrard skora fyrra markið í úrslitaleik deildarbikarsins. Skemmtilegt. Ég reyndist samt vera sá eini þarna inni sem virtist taka eftir þessu. Veit ekki af hverju. Svo var horft á seinni hálfleikinn á ‘The Old English Pub’. Var gaman að sjá sína menn vinna.

Um kvöldið var okkur boðið í mat hjá Hildi og Troels. Hann er grænmetisæta og var þetta því ansi spennandi. Búa þau á Lyovej í Frederiksberg. Voru þau nýflutt inn og var íbúðin öll hin fínasta. Samt vakti það athygli mína hversu lítið klósettið var. Það var u.þ.b. einn fermetri, þ.e. bæði klósett og sturta !!! Við fengum voða góðan mat. Þetta var svona píta með einhverjum bollum og spínatdóti og allskonar grænmeti að sjálfsögðu. Ískaldur bjór drukkinn með. Fínasta kvöldstund. Sáum líka video um Ísland sem Troels hafði gert um jólin. Hann er svona grafískur hönnuður.

Að matnum kíktum við á Copenhagen Business School og annan skóla sem Harpa er að spá í. Mér leist voða vel á CBS. Annars var kvöldið voða rólegt eftir þessa skemmtilegu en köldu kvöldgöngu. Kveðjustundin var svo erfið.

Mánudagur 3. mars
Vaknað klukkan 9 sem var ágætt. Drifum okkur í morgunmat og svo var bara leigubíll í University of Copenhagen. Harpa er að spá í að reyna að komast þangað í uppeldisfræði. Skoðuðum ‘Humanities’ bygginguna. Þetta var bara svona skóli. Ekkert mikið um það að segja. Tókum svo strætó til baka. Það var afar spennandi. Tókum lokarölt um strikið. Harpa verslaði smá í H&M. Jájá.

Svo var bara farið uppá hótel og tjekkað sig út og leigubíll uppá Kastrup. Flugið fór um 13:30. Þetta var Kaupamannahafnarferðin. Hún var bara fín.

Sorry Funi og Hjalti að ég hafði ekki samband. Ég var bara of vitlaus til að skrifa niður símanúmerið þitt áður en ég fór. Kemur bara næst.


Hagnaðurinn